00:00:00 IGIHE NETWORK KN KINYARWANDA EN ENGLISH FR FRANCAIS

Ese koko u Rwanda rwatuwe n’Ibimanuka?

Yanditswe na Nsanzabera Jean de Dieu
Kuya 1 July 2022 saa 03:18
Yasuwe :

Ibimanuka, ni izina ryabiciye bigacika mu myaka isaga 1322 (700-2022) rimaze ryadutse. Nubwo ari izina rirambye imyaka myinshi ingana kuriya, ariko ikibabaje ni uko kugeza ubu Abanyarwanda bakiribyiniraho urunyurane, kubera ko abashobora guhamya igisobanuro cyaryo cy’ukuri bari hafi ya nta bo!

Ni izina ryakuruye impaka nyinshi na n’ubu rukigeretse, kugeza ubwo rinaremye urujijo ruhanitse mu Banyarwanda cyane cyane mu iyimukayimuka ry’abatuye u Rwanda kuva mu muzi wa rwo.

Aho ni ho abantu benshi bakunze guhera bahamya ko izina Ibimanuka rivuga abantu bavuye mu ijuru bakaza gutura mu Rwanda nta hantu bavuye handi ku isi cyangwa se batabyawe. Ari na byo bikomeza gushyira urujijo ku iyimukayimuka ry’abahanze u Rwanda n’aho bakomoka kandi na byo ari ingenzi kubimenya.

Kandi burya ukuri nyako ku iturwa ry’isi ni uko igice kinini cyayo cyabanje kuba amashyamba cyimeza y’inzitane yari indiri y’inyamaswa n’ubutaka budatuwe. Igikundi cy’abantu aba n’aba bakikora bakava mu gihugu cy’abakurambere babo bakavogera ayo mashyamba bakayirukanamo izo nyamaswa bakayahangamo gakondo yabo nshya y’igihugu gituwe.

Iyo si inkuru mbarirano kuko na n’ubu haracyari ibihugu bifite amashyamba ya cyimeza yahangwamo ibihugu nka mirongo itatu bingana n’u Rwanda. Ari nayo mpamvu buri muntu wese utuye mu gihugu iki n’iki aba afite igisekuruza cye cya kure cy’inkomoko ya kera na kare.

Ese ko amateka atugaragarije ko buri muntu agira igisekuruza cya kure akomokamo mbere y’iyimukayimuka rye ajya guhanga gakondo ye nshya, ibirari by’abatuye u Rwanda biswe Ibimanuka cyangwa se ibivejuru byavuye mu ijuru bikaza gutura u Rwanda, byaba bikomoka he?.

Nk’uko amateka y’iyaduka ry’izina:”Ibimanuka” abitugaragariza, ni izina rifite ibirari-nkomoko ahasaga mu wa 700, mu kibariro cy’ibihe byacu.

Rikaba ari izina ryahawe Abanyiginya, ubwo basesekaraga ino bakomotse mu bihugu byo mu burasirazuba bw’amajyaruguru ya Afurika. Aho barasukiye ni ku butaka bwagengwaga n’Abazigaba baremye ingoma y’u Rweya rw’u Mubali. Iyimukayimuka ryabo, ryaturutse ku kuba barashakaga ubwinyagamburiro bw’imiryango yabo n’inka zabo.

Bagisesekara mu by’ino, basanze Abazigaba n’Abasinga aribo bakabye ubutaka bwo muri aka karere, barabuhanzemo ibihugu 24, kuko bari biyemeje ko iby’iyimukayimuka babihagaritse bahise basaba Abazigaba ko babacumbikira bakabana muri icyo gihugu cyabo, Abazigaba barabibemerera.

Ubutaka bw’u Rweya rw’u Mubali, babugezeho barabwishimira, basanga ari bwo bashakaga biyemeza ko batazongera kwirirwa bimuka bimuka, kuko aho bashakaga bahageze.

Mu myaka iyinga Magana ane (700-1091) Abanyiginya bamaze mu busembere mu Rweya rw’u Mubali, Abazigaba n’Abasinga bakomeje kubajora mu mitekerereze, mu migenzereze, mu mibereho n’imibanire, mu mivugire, basanga bahabanye n’uko bari bazi abandi basangiye ubutaka bw’akarere batuyemo, nuko babita izina ndangatandukaniro ry’Ibimanuka.

Abasinga n’Abazigaba ni bo bise Abanyiginya:”Ibimanuka”. Abakurambere ba Gihanga ni bo bakunze kwitwa:"Ibimanuka" mu mateka y’u Rwanda, ntibazwi amazina ya bo, gusa hari ayo abanyamateka bagiye babita mu rwego rwo kuziba icyuho kigaragaza amazina y’abakurambere b’imbanza b’umuryango w’Abanyiginya mu Rwanda, ari na wo Gihanga akomokamo.

Ni ho dusangamo abitwa ba: Shyerezo Nkuba, Kigwa, Muntu, Kimanuka, Kijuru, Kobo, Merano, Randa, Gisa, Kizira, Kazi na Gihanga. Bose bakaba babumbye igisekuruza cy’imyaka iyingayinga Magana ane (700-1091) kugeza kuri Gihanga Ngomijana wabaye ibimburiro ry’ihangwa ry’igihugu cy’i Gasabo cyaje kubyara u Rwanda.

Aba bose ni bo babaye ibirari by’amateka y’Abami b’Ibimanuka bakunzwe kumvikana mu mateka y’u Rwanda nk’umugani, kuko n’ubundi nta gihugu kizwi bagiraga, kuko bari abacumbitsi mu gihugu cy’Abazigaba. Kandi mu mateka y’u Rwanda, nta we uba umwami atagira igihugu.

Iyo ufatiye ku ndimi z’amahanga nk’Igifaransa, ni bwo ubasha kumva neza icyo izina Ibimanuka ryahawe Abanyiginya rivuze mu mateka y’u Rwanda. Ibimanuka ubundi bivuga:"Les descendants pour changement ". Bisobanuye: “Abageze ino bafite Impinduramatwara”, haba mu myumvire, imiyoborere, imibereho n’imibanire, ububanyi n’amahanga n’ubutwererane, ubworozi n’ibindi".

Ibimanuka kandi bivuga: « Les Missionnaires ». Abantu baje bafite ikibazanye, bafite intego bagomba kurasa byanze bikunze. Nuko babashakira izina ry’iciro ry’imigani rihinduka imvugo izimiza ibagaragaza nk’abadasanzwe n’iyo bakomoka mu Majyaruguru y’Iburasirazuba bwa Afurika, ariryo ry’Ibimanuka.

Nubwo iyi nyito ndangatandukaniro yahawe Abanyiginya yaremewe mu Rweya rw’u Mubali mu gihe cy’iyaduka ryabo mu by’ino ahasaga mu wa 700, ariko yamamaye cyane kurushaho ubwo Gihanga yahangaga igihugu cye cy’i Gasabo nk’ikimenyetso cy’uko ibyo babakekagaho ko ari byo. Icyo bagiye kuvuga cyose cyerekeye igihugu cy’i Gasabo n’abagenga ba cyo ari bo Banyiginya, bakavugamo Ibimanuka.

Hari byinshi byaranze Abanyiginya bitari bisanzwe mu karere byatumye barushaho kwibazwaho cyane, bimwe muri byo ni ibi bikurikira:

Abanyiginya, bari inzobere mu bworozi bw’inka, ku buryo yarenze kuba itungo iri banywa amata, bayigira urufatiro rwa politiki y’ubukungu, imibereho myiza y’abaturage, umutekano, ububanyi n’amahanga n’ibindi.

Abanyiginya, bari bafite uburambe mu buyobozi, bafite uburambe bw’ikirenga mu bumenyi bw’imibanire y’abantu n’abandi, bafite umuco, kugira ubumwe n’ubufatanye haba mu miyoborere no mu baturage muri rusange, ari inzobere mu bubanyi n’amahanga.

Abanyiginya, bari bafite Ingengabitekerezo yo kwiyemeza no kudatezuka ku ntego, bari indwanyi cyane, kubera amateka y’aho bagiye banyura bakahahurira n’ingorane zituma binjira mu ntambara, zo guhangana n’inyamaswa z’Inkazi zashakaga kubavutsa ubuzima n’Inka zabo.

Ikindi bari bafite ni ukumenya gushyira ibintu k’umurongo no kudakorera mu kajagari. Abanyiginya bari inzobere mu gucunga abantu no kubabyaza umusaruro.

Iyo mitekerereze n’imigenzereze ndangatandukaniro ni imwe mu byatumye Abanyiginya babita izina ry’Ibimanuka, bitewe n’ibidasanzwe basesekaraye muri aka karere.

Aho akaba ari ho benshi bahera bahamya ko u Rwanda rwatuwe n’abavuye mu ijuru biswe Ibivejuru kandi bitarigeze bibaho ko hari umuntu wavuye mu ijuru ngo ature kuri ubu butaka bw’u Rwanda.

Gihamya cy’ukuri ni uko buri wese afite igisekuruza cye cy’inkomoko cyabayeho mbere y’uko aza gutura mu Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .