Kuva ku ngoma ya cyami kugeza ubu umwihariko w’umuco nyarwanda ushimangirwa n’imbyino gakondo nka rumwe mu rwibutso rw’amateka ishingiye ku muco.

Nubwo hari indangagaciro zagiye zizimira, imbyino ziracyari mu bihesha u Rwanda isura nziza mu ruhando mpuzamahanga, kuko ziri mu bikurura ba mukerarugendo ndetse zikanagaragariza amahanga ko u Rwanda rugifite umwihariko warwo.

Ahayinga mu kinyejana cya 18, u Rwanda rwarangwaga n’imikino igiye itandukanye nko Gusimbuka, Gusiganwa, Gusakuza nibindi bikorwa byo guhiga, kuragira, ndetse byose byarangazwaga imbere n’imbyino ndetse n’imyiyereko y’Intore.

Kubyina byajyanaga no kuririmba indirimbo za gakondo zaba zitaka Umwami ndetse zivuga n’ibindi bikorwa byo gushikama ku igihugu n’abaturage bacyo, icyo gihe mumbyino harangwagamo inkumi zitega amaboko nkinyambo ndetse zibyina ziseka zereka abari mubirori akanyamuneza.

Intore zarangwaga no kwivuga ndetse n’umudiho n’imyambarire y’impu zinyamanswa zitandukanye.

Imbyino gakondo yagiye isigasirwa n’abagiye bavuka, dore ko na n’ubu igikoreshwa mu gususurutsa abanyu bitabiriye ibikorwa/imihango bitandukanye nko mu bukwe, mu bitaramo byo gufungura ibikorwa bitandukanye ndetse no mu mahanga ya kure.