Urubyiruko rw’u Rwanda rurakangurirwa kwita ku muco ruwugarurira isura wahoranye, ibi rukazabigeraho rusura ingoro z’umurage z’u rwanda zisigasiye amateka y’uyu muco.

Ni muri urwo rwego ikigo cy’igihugu cy’ingoro z’umurage w’u Rwanda cyateguye gahunda idasanzwe ku rubyiruko rw’abanyeshuri n’abarezi bo mu mashuri yisumbuye mu karere ka Huye, basura Ingoro z’Umurage zo bushyinguro bw’amateka n’umuco w’Abanyarwanda, hagamijwe ko bamenya byinshi kuri aya mateka n’ibyiza by’umuco nyarwanda.

Iyi gahunda yatangirijwe mu karere ka Huye kuva muri Werurwe kugeza muri Kamena 2013, aho abakozi b’icyo kigo basuye ibigo10 biherereye muri ako karere, abanyeshuri basaga ibihumbi bitanu bakaganirizwa kandi bakanasobanukirwa byinshi ku mateka ari muri izi ngoro n’imikorere y’ahashyinguye amateka y’u Rwanda.

Nsengiyumva Faustin, Umukozi w’ikigo cy’ingoro z‘igihugu z’umurage w’u Rwanda ufite mu nshingano ze kwegereza abaturage ibikorwa by’icyo kigo, yavuze ko iki gikorwa gitegerejweho kuzatanga umusaruro mu bijyanye no kongerera ubumenyi urubyiruko ruri mu mashuri, ku muco w’igihugu cyabo, kuwumenyekanisha kugira ngo udatakaza isura wahoranye.

Muri rusange mu bigo byose abanyeshuri bagaragaje ko kuba iki kigo cyarabegereye hari byinshi bamenye batari bazi ndetse bibatera n’imbaraga n’ubushake byo gusura Ingoro zitandukanye, mu rwego rwo kurushaho kugira ubumenyi ku muco n’amateka y’abakurambere. Abanyeshuri kandi bashishikarijwe gukora amatsinda y’umuco mu bigo bigamo aho icyiciro cya mbere cyarangiye hamaze gushigwa amatsinda (clubs) mu bigo bitandatu.

Iyi gahunda isoje iki cyiro cyayo cya mbere cyatangiye muri Werurwe 2013, ibigo bine mu icumi by’amashuri bimaze gusura Ingoro z’Umurage. Biteganijwe ko iyi gahunda izakomereza mu tundi turere tugize u Rwanda, muri Nyakanga iyi gahunda izakomereza mu bigo by’amashuri yisumbuye mu mujyi wa Kigali.

Ikigo cy’Igihugu cy’Ingoro z’Umurage w’u Rwanda, gifite ingoro esheshatu zifite inshingano zo gusigasira umuco gakondo w’abakurambere.

Muhirwa Jean Remy/Umunyeshuri muri ICK wimenyereza umwuga w’itangazamakuru muri INMR.