{Nubwo mu gice cya mbere Amissi Cedric na Papy Kaminzi batsindiye Rayon Sports ibitego bibiri, AC Léopards de Dolisie yabyishyuye mu gice kabiri, Rayon ihita isezererwa muri 1/32 cya CAF champions league kubera igitego cyo hanze.

Igice cya mbere: Rayon Sports 2-0 AC Léopards de Dolisie

Imbere y’abafana babo n’Abanyarwanda, Rayon Sports yinjiranye mu kibuga icyizere n’ imbaraga nyinshi itangira isatira AC Léopards banganyirije muri Congo Brazza 0-0.

Umutoza wa Rayon Sports, Luc Eymael yahisemo kubanza hanze rutahizamu Kagere Meddie aha umwanya Mwiseneza Djamali wakiniraga inyuma ya Kambale Salita Gentil “Papy Kamanzi” agafasha na Amissi Cedric na Ndayisenga Fuadi mu mpande.

Rayon Sports yasatiriye bikomeye AC Léopards, ibona amahirwe menshi atabyajwe umusaruro ahubwo akavamo koroneri.

Mbere yo kujya kuruhuka Papy Kamanzi yatsinze igitego cya mbere ku munota wa 45, mu gihe ba myugariro ba AC Léopards bagihuzagurika Amissi Cedric abinjirana mu rubuga acenga abo yahasanze n’umunyezamu atsinda igitego cya kabiri nyuma y’iminota itatu.

Igice cya mbere kirangiye abakinnyi ba AC Léopards bashatse kurwanya abasifuzi b’Abanyatanzania, bafashijwe na Polisi y’igihugu basubira mu rwambariro.

Kuba muri iki gice Rayon Sports yarushaga bigaragara AC Léopards, byahaye benshi icyizere ko ikora amateka igakatisha itike ya 1/16 isezereye ikipe yageze mu matsinda, yatwaye CAF confederation cup mu 2012.

Benshi bari banyuzwe n’iyi mikinire batangiye kugabira Rayon Sports, aho imwe muri sosiyete yayihaye miliyoni imwe n’ibihumbi magana atanu (1,500,000 Rwf).

Igice cya kabiri: Rayon Sports 0-2 AC Léopards de Dolisie

Mu rwego rwo kugumana umukino n’imikinire bari bafite mu gice cya mbere, umutoza wa Rayon Sports yasabye abakinnyi be kwibagirwa ibitego bibiri batsinze bagafata nk’aho umukino utangiye.

AC Léopards y’umutoza Patrick Aussems yaje ituje, ahita yinjizamo abasore babiri, yongera kwibona mu mukino.

Ku munota wa 57, Gandze Cesail yinjije igitego cya mbere n’umutwe, cyahise gica igikuba mu b’inyuma ba Rayon Sports mu gihe bacyisuganya neza Umunyanigeria Mahamane Cisse wavuye AC Joliba atsinda igitego cya kabiri.

Byabaye ngombwa ko umutoza Eymael akuramo Mujyambere Alipe, Kambale Salita Gentil na Mwiseneza Djamali hinjira Kagere Meddie, Ndatimana Robert na Samson Jakeshi wananiwe kwigaragaza muri uyu mukino.

Sibomana Hussein yasubiye inyuma afatanya na Serugendo Arafat mu mutima wa ba myugariro.

Rayon Sports yashoboraga kubona igitego mu minota ya nyuma gusa Kagere wari ufite umupira mu rubuga rwa AC Léopards ananirwa guhindukira asubuje inyuma Fuadi awutera hejuru y’izamu.

Umusifuzi yongeyeho iminota 7 y’inyongera, AC Léopards yabonye ikarita y’umutuku, Amissi Cedric abona uburyo bwo gutsinda igitego maze umupira unyura hanze gato y’izamu.

Hashize iminota 13 nibwo umukino warangiye, AC Léopards de Dolisie itahana intsinzi y’igitego cyo hanze n’itike ya 1/16 nk’uko bari babivuze bagera i Kigali kuri uyu wa Kane.

Ni umukino warangiye mu mahane menshi mu kibuga no mu bafana.

Mu kibuga habayeho guterana amagambo hagati y’abatoza bombi bakomoka mu Bubiligi, ubwo igice cya mbere cyarangiraga Aussems yabwiye Eymael ko umusifuzi yabogamiye kuri Rayon Sports gusa uyu mutoza wabonye intsinzi yavuze ko ntacyo yavuga ku misifurire kuko ari ikibazo kiri muri Afurika yose.

Ku rundi ruhande, Hitimana Thierry yagaragaye adacana uwaka n’umunyezamu wa AC Léopards de Dolisie wari wasimbuwe nyuma yo kuvunika.

Abakinnyi ba Rayon Sports babanje mu kibuga: Bikorimana Gérard; Nizigiyimana Karim “Makenzi”, Serugendo Arafat, Mujyambere Alipe , Abouba Sibomana; Sibomana Hussein, Uwambajimana Léon, Mwiseneza Djamal, Ndayisenga Fuad; Hamissi Cedric na Kambale Salita Gentil.

[email protected]