Imiryango igera kuri 76 mu 155 yari yaraguze ubutaka mu gace kagenewe ubworozi, mu mudugudu wa Gakagati II, Akagari ka Rusumo, Umurenge wa Rwimiyaga, Akarere ka Nyagatare, bakaza gusenyerwa n’Akarere, ubu yamaze gusubiza amafaranga yari yaratanze asaga Miliyoni 62,5.
Iki gikorwa cyo gusubiza amafaranga abari baraguze ahagenewe ubworozi bakahahindura agace k’ubuhinzi, gikozwe mu gihe abahauye basenyewe bakajya gucumbikirwa n’akarere, ubu amafaranga bahabwa barimo kuyagura ubundi butaka mu mirenge ya Rwimiyaga, Musheri na Tabagwe.
Nk’uko IGIHE twabitangarijwe na Stanley Muganwa, Umuyobozi w’Akarere ka Nyagatare wungirije ushinzwe iterambere ry’ubukungu, abo baturage barasubizwa amafaranga binyuze muri Koperative y’aborozi yo mu karere ka Nyagatare, imiryango 76 ikaba imaze gusubizwa utwayo. Muganwa agira ati “Imiryango 76 mu 155 yari ikodesherejwe mu murenge wa Rwimiyaga imaze gusubizwa amafaranga yari yatanze igura ubutaka. Igikorwa ntikirangiye kiracyakomeza. Abahawe amafaranga turabafasha kubona ubundi butaka bagura bujyanye n’ubuhinzi, kandi nta n’umwe uzahomba.”
Akomeza avuga ko ubundi itegeko riteganya ko uwaguze ahantu hateganyirijwe ubworozi akahakorera ibikorwa by’ubuhinzi, ndetse n’uwagurishije bombi bamburwa ubutaka. Agira ati “Ariko kuko abaguze batanze amafaranga yabo kandi bose ari Abanyarwanda, twabafashije gushaka abayabasubiza, ariko abagurishije bo n’ubundi nta butaka bari bafite.”
Avuga kandi ko nta kibazo cy’ubutaka abasubijwe amafaranga bagomba kugira, kuko uwahawe make yasubijwe asaga ibihumbi 750, kandi yabona ubutaka bwiza. Aburira abagura ubutaka kubanza kumenya icyo buteganyirijwe gukora, kandi bakifashisha inzego bireba kugira ngo hato batazahomba.
Ku kibazo cy’uko hari abari bamaze guhungira muri Uganda, Muganwa Stanley avuga ko nta muntu n’umwe azi waba warahunze kubera icyo kibazo, kuko iyo bagiye gutanga amafaranga umugabo n’umugore bagomba kuba bari kumwe.
Iki kibazo cyagarutsweho n’Umunyamabanga Nshingwabikorwa w’Umurenge wa Rwimiyaga, Muyango Emmanuel, wadutangarije ko itoroka ry’abo baturage ntacyo ariziho, ko abacumbikiwe bose bahari kandi kugira ngo bahabwe amafaranga ari uko Koperative iyabasubiza ibanza kubarura imitungo, ndetse umugabo n’umugore basabwa kuba abri kumwe.
Na ho ku birebana n’uko hari bamwe mu bayobozi b’inzego z’ibanze bariye, Muganwa Stanley avuga ko icyo kibazo kitabagezeho ariko uwaba aziko yarenganyijwe yakwegera ubuyobozi bw’akarere bukamufasha akarenganurwa.
Igikorwa cyo gusubiza iyi miryango amafaranga yari yaguze ubutaka bivugwa bwari bugenewe ubworozi, bo bakahahindura ubuhinzi, cyatangiye ku wa 8 Werurwe 2014, imiryango 76 yamaze guhabwa utwayo, igikorwa kikaba kigikomeza. Ariko igikomeye kirimo ni uko ngo hari ibihisha bagahindura amasezerano y’ubugure, bituma bibanza kwigwaho neza kugira ngo bishyurwe.
N’ubwo ariko bimeze bityo, imiryango imwe ntirakira amafaranga bivugwa yaba ihabwa make atajyanye n’ayo batanze, dore ko ngo bari bamaze imyaka igera kuri ine baraguze, amafaranga yabo yagombye kuba yarabyajwe umusaruro. Amaze gutangwa agera kuri 62,515,236 z’amafaranga y’u Rwanda, biteganyijwe ko igikorwa cyo gusubiza amafaranga abo baturage kizarangirana n’impera z’uku kwezi niba nzitizi zibayemo.
Soma izindi bifitanye isano:
1. http://igihe.com/amakuru/u-rwanda/article/nyagatare-abagize-uruhare-n
2. http://www.igihe.com/amakuru/u-rwanda/article/nyagatare-isenyerwa-ry-abaturage
3. http://igihe.com/amakuru/u-rwanda/article/nyagatare-imiryango-100-yasenyewe
TANGA IGITEKEREZO