Gaadiidka FC yageze ku Kibuga Mpuzamahanga cy’Indege cya Kigali saa Sita na 45 nk’uko byari biteganyijwe gusa ibanza kubura imwe mu mizigo yabo yazanywe n’indege ya Ethiopian Airlines bituma bakererwaho isaha n’iminota 15 gusohoka mu kibuga.

Abakinnyi n’abayobozi ba Gaadiidka FC bahagurutse ku wa Kane muri Somalia saa Saba n’iminota 20 z’i Kigali, berekeza i Addis Abeba muri Ethiopia aho bavuye saa Tatu n’iminota 45 z’umugoroba, bagera i Kigali mu ijoro, saa Sita n’iminota 45.

Iyi Kipe yazanye na Perezida wayo, Bile Moha'ud Jimale, Umutoza Mukuru Dadir Amin Ali n’abungiriza be ndetse n’abakinnyi bose bageze i Kigali ntawe ugiriye ikibazo mu nzira. Bahise bakomereza kuri Hotel Villa Portofino i Nyarutarama mu Mujyi wa Kigali.

Iyi kipe yari yabuze ubushobozi buyigeza i Kigali gukina na APR FC muri CAF Champions League yabanje kugorwa n’amikoro ku buryo kugeza ku wa Gatatu mu gitondo, nta cyizere cyo kwerekeza i Kigali cyari gihari.

Ejo ku wa Kane, tariki 16 Kanama 2023, ni bwo byemejwe ko iyi kipe izahagaruka i Mogadishu nyuma yo gushyigikirwa n’Ishyirahamwe rya Ruhago muri Somalia.

Biteganyijwe ko Gaadiidka FC izakorera imyitozo kuri Kigali Pelé Stadium ku wa Gatanu saa Cyenda, amasaha izakiniraho na APR FC ku wa Gatandatu.

Iyi Kipe kandi yasabye Impuzamashyirahamwe y’Umupira w’Amaguru muri Afurika (CAF) ko umukino wayo wo kwishyura na wo wabera i Kigali ku wa Kane, tariki ya 24 Kanama kuko nta kibuga cyemewe na CAF bafite kuko ubusanzwe imikino yabo bayakirira mu gihugu baturanye cya Djibouti.

Umukino ubanza uzahuza APR FC na Gaadiidka FC uteganyijwe kubera kuri Kigali Pelé Stadium ku wa Gatandatu, tariki ya 19 Kanama mbere y'uko uwo kwishyura ukinwa ku wa 24 Kanama 2023.

Ikipe izakomeza hagati ya APR FC na Gaadiidka FC, izahura na Pyramids FC yo mu Misiri, mu ijonjora rya kabiri rizakinwa mu mpera za Nzeri.

Gaadiidka FC yo muri Somalia izakirira APR FC i Kigali yageze mu Rwanda
Gaadiidka FC yo muri Somalia izakirira APR FC i Kigali yageze mu Rwanda
Gaadiidka FC ishaka kwandika amateka yo gusezerera APR FC mu ijonjora rya mbere rya CAF Champions League
Gaadiidka FC ishaka kwandika amateka yo gusezerera APR FC mu ijonjora rya mbere rya CAF Champions League
Iyi kipe yageze i Kigali nyuma y'igihe ihanganye n'ikibazo cy'amikoro
Iyi kipe yageze i Kigali nyuma y'igihe ihanganye n'ikibazo cy'amikoro

Amafoto: Ntare Julius

Video: Irakoze Excellent