CAF yemeje ko Ngudikama w’imyaka 28 ahagarikwa nyuma y’isuzuma ryavuye mu bizamini byafashwe ubwo RDC yari imaze gukina na Angola mu mikino y’amatsinda ya CHAN 2016 yabereye mu Rwanda muri Mutarama.

Ibizamini byafashwe byagaragaje ko uyu mukinnyi yari yakoresheje imiti yongera imbaraga.

BBC dukesha iyi nkuru itangaza ko Emmanuel Christian Ngudikama bakunze kwita ‘Kila’ yahagaritswe kuri iki cyumweru tariki ya 10 Nyakanga nyuma y’imyanzuro yavuye mu nama yahuje abagize akanama ka CAF, yateraniye i Cairo mu Misiri kuya 3 Nyakanga.

Uyu mukinnyi wari ugiye kuzajya akinana na rutahizamu w’Umunyarwanda, Sugira Ernest mu ikipe ya AS Vita Club, yari yarahagaritswe by’agateganyo muri Mata uyu mwaka mu gihe hari hagitegerejwe umwanzuro wa nyuma.

Ngudikama ukina hagati mu kibuga yari kumwe n’ikipe ya RDC yatwaye igikombe cya CHAN 2016 yabereye mu Rwanda.

Ku mukino wa nyuma wabereye kuri Stade Amahoro batsinze Mali ibitego 3-0.

Indi nkuru bifitanye isano :Umukinnyi wa DR Congo yahagaritswe kubera gukoresha ibiyobyabwenge muri CHAN 2016

Emmanuel Christian Ngudikama yahagaritswe imyaka ibiri adakina mu marushanwa yose yemewe na CAF